Статья бу сайтан ылылынна: https://mdnutkina.sakha.muzkult.ru/news/90846301
Олунньу 9 күнүгэр судаарыстыбаннай, бэлитиичэскэй, уопсастыбаннай диэйэтэл Исидор Никифорович Барахов төрөөбүтэ 125 сылыгар анаан «Сата» куруһуокка дьарыктанар оҕолор Үөһээ Бүлүү Харбалаах нэһилиэгин түмэлигэр ыалдьыттаан кэллилэр.
7 кылаас үөрэнээччилэрэ Алеша Жирков, Дьулустаан Николаев, Володя Герасимов Исидор Бараховка анаммыт хоһооннору өйтөн аахтылар, буолаары турар сурук-бичик күнүгэр сыһыаран 11 кылаас үөрэнээччилэрэ Виолетта Иванова, Олеся Петрова Исидор Барахов саха тылын сайыннарыыга, дьоҥҥо-норуокка тиэрдиигэ күүскэ үлэлэһэн бастаан «Манчаары» онтон «Кыым» хаһыаттары бэчээттэтэн таһаартарбытын туһунан уонна Ньурба чаҕылхай уола судаарыстыбаннай, бэлитиичэскэй диэйэтэл Степан Васильев Исидор Бараховтыын, Максим Аммосовтыын, Платон Ойунскайдыын автономияны төрүттэспиттэрин туһунан кэпсээбиттэрин түмэл үлэһиттэрэ хайгыы иһиттилэр уонна үөрдүлэр.
Ол кэннэ Н. Золотарев-Якутскай түмэлин көрдүлэр, байыаннай үөрэхтээх киһи хайдах суруйааччы буолбутун туһунан биллилэр. Түмүккэ Харбалаах түмэлин үлэһитэ Семенова Е.П. Исидор Барахов туһунан сэргэх викторина ыыппытыгар оҕолор көхтөөхтүк кытыннылар.
Оҕолор элбэх саҥаны билэн-көрөн сэргэхсийэн, түмэл үлэһиттэригэр махтанан өссө да кэлэ сылдьыах буолан бардылар.
Күн иккис аҥаарыгар Үөһээ Бүлүүгэ этнография түмэлин көрдүлэр, Үөһээ Бүлүү улууһа тэриллибитэ 88 сылыгар анаммыт быыстапканы сэргээтилэр.
Ыаллыы сытар улуустарын историятын кытта билистилэр. Үөһээ Бүлүү символа буолбут «Хотун Бүлүү» монуменын көрдүлэр.
Элбэҕи билэн, көрбөтөхтөрүн көрөн оҕолор астынан уһун суолларын билбэккэ айаннаатылар.
В.А. Петрова аатынан кыраайы үөрэтэр түмэл.